நீங்கள் உங்களை நகர்த்துங்கள் வேகமாக

சொற்கள் மிதக்கும் அறையில்
மௌனமாக நிரம்பி இருந்தாள் அவள்

பசிப்பொழுதினில் பசலைக் கால
பிசுபிசுப்புகளை உண்டு வியாபித்தாள்

தனித்த இரவின் வெம்மைச் சுவரில்
அவள் எதை எதையோ வரையத் துடிக்கிறாள் 

பேரன்பின் உதட்டு முத்தம்
கண்ணாடிச் சில்லுகளாய் சிதறிக் கிடக்கும்
அப்படுக்கை அறையினுள்,

யாருடைய இசையையோ நிரம்பப் பருகி
பேதலில் உரக்கக் கத்துகிறாள்

இதென் காதல்..
இதென் காதல்..

நீங்கள் நகர்த்துங்கள் உங்களை வேகமாக! 



நன்றி உயிரோசை..